Heilgámaflutningar

Það er að mörgu að huga við val á gámum. Hér er farið yfir helstu stærðir, gerðir, hugtök og annað sem gott er að hafa í huga við heilgámaflutning.
Notaðir eru 20 og 40 feta gámar af ýmsum gerðum:

• Þurrgámar til flutnings á ýmiskonar þurrvörum (fatnaði, búslóðum, húsbúnaði, iðnaðarvörum o.s.frv.).
• Hitastýrðir gámar (kæli- og frystigámar) til flutnings m.a. á matvælum, fiskafurðum, ýmsu hráefni og annarri vöru sem er viðkvæm fyrir breytingum á hitastigi.
• Opnar einingar (fleti, gaflgámar, opnir gámar o.s.frv.) til flutnings á ýmiskonar grófvöru, tækjum, stórum einingum og yfirstærðum.

Ýmist fær sendandi gáma senda til sín og hleður þá sjálfur, aðilar á hans vegum hlaða eða sendandi sendir vöru til Eimskips sem sér þá um hleðslu gáms. Ábyrgð á gámahleðslu, talningu inn í gám og sjóbúningi er hjá þeim aðila er annast hleðsluna og er lýst í farmskrá með eftirfarandi hætti:

• FCL/FCL - sendandi hleður gám og móttakandi tæmir
• LCL/FCL - Eimskip hleður gám og móttakandi tæmir
• FCL/LCL - Sendandi hleður gáma og Eimskip tæmir.
• LCL/LCL - Eimskip hleður gám og tæmir.