Þann 3. nóvember 2014 kærði Eimskipafélag Íslands hf. ásamt dótturfélögunum Eimskip Ísland ehf. og TVG Zimsen ehf. ákvörðun Samkeppniseftirlitsins frá 28. október 2014 til áfrýjunarnefndar samkeppnismála. Í hinni kærðu ákvörðun synjaði Samkeppniseftirlitið beiðni félaganna um aðgang að kæru og fylgiskjölum Samkeppniseftirlitsins til embættis sérstaks saksóknara.
Áfrýjunarnefnd samkeppnismála hefur úrskurðað í málinu og fellt úr gildi ákvörðun Samkeppniseftirlitsins. Lagt er fyrir Samkeppniseftirlitið að taka á ný afstöðu til kröfu Eimskipafélags Íslands hf. og ofangreindra dótturfélaga um afhendingu gagna á grundvelli þeirra ákvæða í samkeppnis- og stjórnsýslulögum sem gilda um aðgang aðila að gögnum máls.
Í ljósi þessarar niðurstöðu áfrýjunarnefndar samkeppnismála vonast Eimskip til að fá aðgang að hinum umkröfðu upplýsingum við fyrsta tækifæri. Þetta er í þriðja skiptið sem áfrýjunarnefnd samkeppnismála fellir að hluta eða öllu leyti úr gildi ákvörðun Samkeppniseftirlitsins.
